Szinka po bajerowsku (Szynka po bawarsku)

Jak żech we sklepie bez cufal1 trefiōł2 take fajne bajerowske mostrichy3, to mie zarozki4 do gowy przilatywały roztomajte5 pomysły. A że lubia i szinka, i pszyniczne piwo, to recept6 bōł7 prawie fertich8. Szinka wyszła arōmatycznoł, miynkoł i aże sie rozpuszczała we gymbie9 😉

Co potrza?

2 kule miysa ôd szinki

3 łeżki słodkego mostrichu bajerowskigo (nojlepszy taki, kery10 majōm do tych biołych wōsztōw11 we München)

3 łeżki ôstrego mostrichu bawarskigo

szklōnka piwa pszynicznego (Weizenbier)

troszka mōnki do zagynszczynia zōłzy

Kebyjście mieli problym ze kupiyniym takich bawarskich mostrichōw, to mogecie dać trzi łeżki jaki ôstryj musztardy i trzi słodkyj, do keryj mogecie dociepnōńć połra roztrzaskanych gojździkōw, ziela angelskego, trocha gałki muszkatałowyj i nojlepi tyż trocha brōnołtnego12 cukru.

Dziyń pryndzyj13 wciepcie14 do gorka po 3 łeżki tych mostrichōw i wymiyszejcie ze piwym.

Miyso ôpōkejcie15 i wciepcie do gorka do tyj marynaty na całoł16 noc. Na drugi dziyń dejcie17 to na piec i niech sie to tak pykoł18 na małym ôgniu bez 3-4 godziny. Potyn marynata ôstołwcie19 na ôgniu i niech ôna trocha odparuje, a miyso wciepcie na 20-30 minut do nagrzōnyj na 200 stopni bratruły20, żeby sie fajnie przibrōnołciōło21. Keby22 zōłza23 bōła za rzołdkoł24, to mogecie rozpuścić w zimnyj wodzie trocha mōnki (pszynnyj, kartołflanyj abo ze majsu25) i niōm jōm zagyńścić. Jak już miyso bydzie26 fertich, to je pokrajcie na szajby27 i na talyrzu polyjcie zōłzōm. Do tego mogecie dać: klōski28, nudle29, uwarzōne kartołfle30, frytki abo i jako fajno żymła31. Smacznego 🙂

1przypadek

2spotkałem, ō- samogłoska w wymowie między o i u

3musztardy

4zaraz

5różne

6przepis

7był

8gotowy

9buzi

10który

11kiełbas

12brązowego

13wcześniej

14wrzućcie

15opłuczcie

16całą

17dajcie

18gotuje

19zostawcie

20piekarnika

21przypiekło

22gdyby

23sos

24rzadka

25kukurydzianej

26będzie

27plastry

28kluski

29makaron

30ugotowane ziemniaki

31bułka

Sam tyż mogecie mie znojś:
Kej lubicie ôbrŏzki
Sam znojdziesz moje filmy
Sam znojdziesz moje filmy
Jak lubisz ćwiyrkać, to sam wlyjź
Visit Us
Follow Me
Dastaniecie mejla ze nowymi receptami
RSS




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*