Szałołt ze granatym (Wybuchowa sałatka ;) )

Niyftorym sie bez lato tak miyrznie¹, że potrzebujōm mocniyjszych wrażyń: skokajōm na tym gumowym powrozie², nurkujōm po jakich starych potopiōnych szifach³… abo sie robiōm szałołt ze granatym 😉 Joł wiym, że niyftore chopy to zarozki chcieliby go narychtować do swoji teściowyj, ale musza Wołs zmartwić- tym granatym to sie mogecie, co najwyżyj, zmarasić⁴ koszula 😉

Co potrza?

gorść⁵ rukoli (gorść łod chopa, a niy łod bajtla⁶ abo idzie dać take całe kupiōne opakowanie)

gorść roszpōnki

połra łeżek łobranego słōnecznika

trocha mani nasiōn sezamu

2-4 tōmaty⁷

150-200 syrka feta

jedne opakowanie kiełkōw ze brokułōw

I tak tak styknie⁸ do 4 ludzi.

Zōłza:

łeżka⁹ miodu
łeżka łoctu balsamicznego
3 łeżki oliwy

3 łeżki oleju- moge być słōnecznikowy

sōl i pieprz

łeżka zōłzy ze granata- idzie cojsik takego kupić we sklepach oriyntalnych, ale ni łōmcie¹⁰ sie tym gowy, jak niy ma, to niy ma 😉

mogecie tyż dac łeżeczka musztardy

Składniki zōłzy wciepcie do jaki miseczki, wymiyszejcie i fertich. Do jaki wiynkszyj michy wciepcie roszpōnka, kiełki i rukola- nojlepi umyte 😉 Słōnecznik i sezam dejcie na suchoł patelnia i trocha uprażcie, ale niy przibrōnołćcie¹¹ za kans¹². Pōmidorōm seblyczcie¹³ skōra i pokrejcie we kosteczka, tak samo i ta feta. Dociepcie razym ze ziorkami do tyj srogi michy, wymiyszejcie ze zōłzōm i sie biercie za jedzynie. Do grilla bydzie tyn szałołt idealny… smacznego 🙂