Grillowane szpargle ze pesto (Zielono mi ze szparagami)

Pesto, jak chyba wszyjscy wiycie, prziciōngło¹ dō nołs² ze Włoch. We sklepie sie je idzie kupić we małyj krauzce³, ale jak fto sie rołz sprōbuje je zrobić sōm, to na te kupne niy bydzie chcioł ani wejrzeć. Robi sie je gibko⁴, a potyn idzie trzimać we lodōwce i zjejś sie je ze nudlami⁵ abo i na sznicie⁶ chleba. Italioki⁷ dołwajōm do tego orzeszki piniowe i jak niy mołcie co robić ze piniyndzmi, to tyż sie je mogecie kupić. Joł dołwōm słōnecznik, je podobny we smaku i 10 razy tōńszy. Sam żech jeszcze wciep trocha kolyndry i smak wyszoł idealny.

Co potrza?

1 pynczek szparglu

Pesto:

1 srogi⁸ pynczek bazylii

połra gałōnzek kolyndry

2 zōmbki czosku

3 łeżki prazōnego słōnecznika

30-40 g parmezanu

1/4 szklōnki oliwy

2/4 szklōnki łoleju słōnecznikowego abo rzepakowego

sōl i pieprz

Joł niy robia tego yno ze samōm oliwōm, bo łona moł aże za łostry smak, a łolyj to wszysko trocha łagodzi. Pamiyntejcie, że nojlepszoł oliwa je ta extra virgin, bo je ze piyrszego tłoczynia i to jeszcze na chōdno⁹.

Szpargle umyjcie, kołżdego sie wejście do rynkōw, wygnijcie go jak łuk i jak pynknie, to ta gōrnoł czyńść je do jedzynia, a dolnoł do wyciepniyńcia. Rozgrzyjcie sie patelnia do grillowanioł abo i grilla, wciepcie tam szpargle i niech sie tam pomału bez 10-15 min przipiykajōm- pamiyntejcie, że trza je tyż połra razy przewrōcić na drugoł zajta¹⁰.

Wszyske składniki pesto wciepcie do blyndera- ze bazylii yno same listki, a kolyndra we całojści- i go włōnczcie… i fertich¹¹. Trza pedzieć, że żołdnyj filozofiji to sam¹² niy ma.

Jak szpargle bydōm miynke, to je dejcie na talyrz, łoblyjcie pesto i smacznego 🙂

Jak Wōm tego pesto łostanie, to dejcie je do lodōwki, do jaki krauzki, a na wiyrch nalyjcie jeszcze kapka oliwy i to tam moge tak trocha sie poczekać na drugi rołz 😉