Mirbetajg ze bananōma (Kruche z bananami)

Jak byjście sie chcieli zjejś kōnsek¹ ciasta, a niy lubicie kupnego, ale tyż niy chce Wōm sie za kans smolić² ze pieczyniym, to tyn mirbetajg bydzie idealny. Szło by pedzieć, że przeca sōm tera³ pozimki⁴, ale zarozki ftojś powiy: tyla łobiyrania. Jabka? Trza by bōło łostrugać…. A banany otwiyrocie, krajecie byle jak i fertich⁵ ! Tyn recept na ciasto je jeszcze łod moji Ōłmy- choć tak po prołwdzie, to łona zawsze piykła i warzōła wszysko na łoko⁶ 😉

Co potrza?

5-6 bananōw

Ciasto:

125 g masła

1 jajco⁷ całe

2 żōłtka

1 szklōnka⁸ cukru

2 szklōnki mōnki pszynny⁹

2 łyżeczki proszku do pieczynioł

skōrka łotarto ze jednyj citrōłny¹⁰

Włōnczcie¹¹ sie piec na 180 stopni. Wszyske składniki ciasta wciepcie do miski i dobrze ugniyćcie. Na spodek łokrōngłyj formy dejcie papiōr do pieczynioł, wyłōżcie na niego połowa abo 2/3 ciasta- wiynksze pó¹² 😉 – i na 10 minut wsołdźcie¹³ do pieca. Reszta ciasta bez tyn czas mogecie dać do lodōwki. Jak już tyn spodek sie trocha przibrōnołci¹⁴, to go wyciōngcie i wciepcie na gōra pokrōne banany, na wiyrch poukłołdejcie reszta ciasta i wrojście¹⁵ do pieca na 40 minut- dejcie pozōr, żeby sie niy przipołlōło.¹⁶

Jak sie upiecze, to idzie je zaserwować i ze lodami. Joł żech je jołd ze lodami cytrynowymi i tyn zestaw bōł richtig dobry- na lato nawet idealny. Smacznego 🙂