Tarta ze rabarbarym (i wszystko jasne ;) )

Rabarbar ze Azji do Europy przikludziōł¹ pōnojś² we XVI wieku Marko Polo. Tyn rabarbar moł kans roztomajtych³ fetaminōw, ale i moł tyż kwas szczawiowy, co to wypłukuje wapń ze łorganizmu i bez to niy idzie go za kans jejś. Ale dyć jak sie rołz⁴ za jaki czas czowiek szczeli jake ciasto ze rabarbarym, to sie przeca nic niy stanie- no chyba, że idzie nōm ło te połra kalorii, jak wpierymy⁵ pó⁶ blachy 😉

Co potrza?

Spodek:

100-150 g masła (zależy, jak chcecie mieć to maślane we smaku)

250 g mōnki pszynny

2 żółtka

50 g cukru

Środek: 1 kg rabarbaru

keliszek czerwōnego wytrawnego wina

3 łeżki cukru

Beza:

2 biołka

100 g cukru (pó szklōnki)

łeżka kartofylmyjlu⁷

Łobiercie rabarbar i potnijcie na 1 cm kōnski⁸. Wciepcie go na patelnia, dejcie cuker, wino i podgrzywejcie tak dugo, aż wyparuje woda i zrobi sie z niego takoł gynstoł kōnfitura.

Piec rozgrzyjcie na 180 stopni. Do jaki miski wciepcie składniki na spodek i wyrōbcie na jednolitoł masa. Wejście sie forma na tarta i wyłōżcie jōm ciastym. Na kōniec mogecie je jeszcze podzióbać widołkōm⁹ i wrojście do pieca na 15-20 minut, żeby się leko przibrōnołciōło¹⁰.

Bez tyn czas ubijcie biołka na piana, dejcie tam cuker i dali ubijejcie. Na sōm kōniec wmiyszejcie¹¹ 1 łeżka kartofylmyjlu.

Na upieczōny spodek wyłōżcie rabarbar, a na wiyrch dejcie piana. Mogecie tyż nożym abo jakōm łyżkōm porobić tam take szpice (podźwigać ta piana do gōry), bo bydzie to potyn fajnie wyglōndać.

Potyn wrojście to do bratruły¹² na 15 min na 180 stopni, a niyskorzi¹³ zmniyjszcie na 60 stopni, uchylcie leko drzwiczki i niech sie to tak ze pó godziny posuszi¹⁴.

Ta tarta je idealno: trocha słodkoł, trocha kwaśnoł… smacznego 🙂