Bigos Teściowyj ( i nie ma co tłumaczyć ;) )

Receptōw^¹ na bigos je kans^². Tyn ślōnski je ze przeciyrym ze tōmatōw^³ i nojczyńścij^⁴ ze kapusty świyżyj i kiszōnyj. Jak żech moji Babie pedzioł^⁵, że chciołbych taki narychtować na Sylwestra, to mi padała^⁶, ze ôn^⁷ je za ajnfach^⁸ i że na Sylwestra to by musiało być co barzi^⁹ eleganckego, no i że tyn bigos ôd ni ôd Mutry^¹⁰ bōłby lepszy… no i tak to Chop niy moł wyjścia, yno musi rychtować Bigos ôd Teściowyj 😉

Trza prziznać, że ôn je richtich^¹¹ dobry, ze śliwkōma, grzibami, winym i całōm gōrōm miysa. Tyn recept je we ôd ni familiji już dojś dugo i zajś idzie na nastympne pokolynie.

Co potrza?

2 kg kapusty kiszōnyj

50 dkg wōsztu^¹²

30 dkg wyndzōnki

80 dkg żeberek wieprzowych

50 dkg karczku abo łopatki

2 cebule

trocha masła klarowanego

ze 5 liści laurowych

5-7 kulek ziela angelskego

1 łeżeczka majeranku

1 łeżeczka tymianku

10-15 suszōnych śliwek

5-7 ziorek jałowca

2 gorście suszōnych grzibōw (nojlepi prawikōw^¹³)

flaszka^¹⁴ czerwōnego wytrawnego wina- niy bōjcie sie, całyj tam niy wlejymy 😉

łeżka cukru

Na sōm^¹⁵ poczōntek przepōkejcie^¹⁶ i wyciście kapusta. Na maśle klarowanym zeszklijcie- we gorku, we ftorym sie bydzie robiōł tyn bigos- pokrōno^¹⁷ cebula i potyn dociepcie^¹⁸ do tego kapusta i niech ôna sie już zacznie pomału warzić^¹⁹. Mogecie do tego tyż już wciepnōńć prziprawy. Tera bierymy sie za boczek, wōszt i miyso. Pokrejcie to wszyjsko i partiami przipiykejcie^²⁰ na patelni i wciepujcie do gorka ze kapustōm. Żeberka mogecie pokroć na wiynksze kōnski^²¹ ze kościōm i po podpieczyniu wciepnōńć do reszty- jak bigos baje fertich,^²² to sie je wyciōngnie i lepi wyciepnie kojści i pokreje^²³. Grziby przepōkejcie^²⁴ i uwarzcie- dejcie yno trocha wody. Jak sie uwarzōm, to je pokrejcie, a woda wlyjcie do kapusty, to bydzie nōm lepi wōniało^²⁵. Dolyjcie do tego jeszcze trocha wina i niech sie to tera podusi… nojlepi połra godzin, yno dejcie pozōr^²⁶, żeby sie niy przipołlōło^²⁷. Mogecie to jeszcze podlywać winym, a pod kōniec wciepcie tam śliwki. Jak już wszyske miysa bydōm miynke, to go jeszcze dosmakujcie^²⁸. Taki bigos je nojlepszy na drugi abo i trzeci dziyń, bez to nojlepi zrobić go aby dziyń przed fajerym^²⁹. Już sie robia godny^³⁰… Smacznego 🙂