Kaczka wōniajōnco rozmarynym (Kaczka z nutą rozmarynu)

Jak mie już wlejzie1 do gowy jaki recept2 nowy… – cojsik te rymowanki mi sam niy pasujōm, ale jak żech już napisoł, to łostawia. Jak tyn recept wlejzie, to zarozki sie za niego biera, a inspiracje sōm wszyndzie: we lodōwce, we befeju3 i niy roz, niy dwa i na fynsterbrecie4 😉 Już skōńcza te fandzolynie5 i biera sie za warzynie… – i zajś te rymy… 😉

Co potrza?

pierś ze kaczki

1 keliszek biołego wytrawnego wina

łotartoł skōra ze jednyj citrōłny

zaft6 ze jednyj citrōłny

połra gałōnzek rozmarynu (choć żech i kajś znod, że sie na niego gołdo tyż rozmaryjon)

ździebko soli i pieprzu

ze 2 łeżki mōnki kukurydzianyj (abo pszynnyj) do zōłzy

Jak mołcie trocha wiyncyj czasu abo szasu- jak to niyftorzi gołdali- to mogecie wino, skōrka, zaft, pieprz i rozmaryn (w całojści) dać do brytfanki ze kaczkōm na całoł noc, ale jak niy mołcie tego czasu za wiela, to abo łodstołwcie to yno na chwila, abo dejcie zaroz na piec i na małym łogniu duście ta kaczka tak 1-1,5 godziny.

Rozgrzyjcie piec na 200 stopni, wyciōngcie kaczka ze brytfanki, ponacinajcie nożym łod ni skōra we kratka i wrojście (bez zōłzy, skōrōm do wiyrchu) do bratruły7 na 15-20 minut, żeby ta skōrka sie tak fajnie na chrupiōnco przipiykła.

We brytfance mogecie ze zōłzy zebrać trocha tego tustego, co pływoł po wiyrchu i wyciepcie tyż te gałyńzie rozmarynu, bo łod niego arōmat już i tak tam łostanie, a idzie o to, żeby niy bōł aż za mocny. We jaki szolce8 we zimnyj wodzie rozrōbcie sie ze 2 łeżki mōnki i dejcie do warzōncyj sie zōłzy. Dosmakujcie sie jōm jeszcze solōm i pieprzym. I jak kaczka sie fajnie podpiecze, to mogecie sie brać za jedzynie. Takoł arōmatycznoł kaczka pasuje do wszyskego, joł żech sie zrobiōł dō ni9 frytki ze batatōw- to take słodke kartołfle- i szłołt, i… wszysko my ze mojōm Babōm zezarli10 😉 Smacznego 🙂

Kaczka wōniajōnco rozmarynym-małe

1wejdzie

2przepis

3kredensie, kuchennej szafce

4parapecie

5przynudzanie, gadanie głupot

6sok

7piekarnika

8kubku

9do niej

10zjedli

Sam tyż mogecie mie znojś:
Kej lubicie ôbrŏzki
Sam znojdziesz moje filmy
Sam znojdziesz moje filmy
Jak lubisz ćwiyrkać, to sam wlyjź
Visit Us
Follow Me
Dastaniecie mejla ze nowymi receptami
RSS




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*